建議用電腦/手機寬屏操作 😊
學習方式 - Méthode
首先呢個學習方法 (Learning method)，係我人生經歷累積出嚟嘅成果。
我識嘅所有中文知識，用法文交畀你哋。目標好簡單：作為母語係中文嘅你，要好似我中文咁講法文。為咗達到呢個目的，
我整咗一個工具、一個專為華人學法文嘅學習平台。
就咁簡單。
我嘅方法好特別，亦都好獨特，因為佢融合咗我喺中國同法國接受過嘅教育。所以我非常清楚自己講緊乜、點解咁講、點樣教。
喺呢度我唔會講得太詳細，因為成日有人抄我嘢，但我會講清楚大方向。
課程就好似戲劇噉 ：分兩幕，一共有九個章節。
每一課都分成三個部分：影片、錄音同 PDF。呢三樣係一體，唔可以分開嘅。
每課都係由淺入深，前一課學過嘅字，下堂會繼續用。
每課仲會有一張例句表，俾你學習課堂內容點樣用落去。
每個字、每句說話、每個動詞、每個時態…都錄咗唔同速度嘅音。
所有字、句、動詞都會有中文解釋或者翻譯。
如果你係講普通話嘅，PDF有三個版本：繁體、簡體同注音。但如果你識講廣東話，就唔使啦，因為識廣東話嘅人，
其實已經係半個法國人。
我仲整咗啲有趣嘅練習，包你鍾意！
呢套方法會令你一路進步，一路打好基礎，等你可以用法文自由講你想講嘅嘢。
所有內容我都好認真講解，慢慢講，清楚解釋，會講好多實用又有趣嘅題目。
例如，啲課唔會一開始就教法文字母，因為其實有好多更重要嘅嘢要早啲學。
網站入面嘅內容全部係我自己諗出嚟，冇抄、冇參考人哋。
我係由零開始，淨係用腦。啲內容係生活入面嚟，直接、實用。
我包你，第一課學完，你已經會有新感覺，因為你會識講幾句真係用得着嘅法文。
課程詳細如下 :
第一幕分兩段 ：(上) 同 (下)
第一幕 (上) · 第一至第三章
你會學到夠用嘅表達方式，可以用法文問問題、溝通、喺生活中前行。 你梗係會識點餐、講自己好唔好、話自己返屋企，但你會覺得仲唔夠。前三章適合想去法國（或者其他講法文地方）住一兩個月嘅人。
(擁有一個好唔錯嘅 A1 程度)
第一幕(下) · 第四至第六章
你會學到更加深入嘅文法，幫你避免犯錯，準確表達自己嘅唸法
識講過去、而家同將來嘅事情或打算。
雖然你詞彙、形容詞、日常用語仲唔算多，
但你會識得用其他方法表達自己。喺我眼中，學到呢個階段就基本上打好咗法文嘅地基。
(係一個好唔錯嘅 A2 程度、弱啲嘅 B1)
第二幕 · 第七至第九章
有咗穩陣嘅基礎之後，你會學識點樣用法文傾任何話題。課程直接用第一幕學過嘅法文主持、需要時會不定時用返中文。
我好難詳細講多啲但第二幕嘅目的係建立屬於自己嘅語言框架。
(學完整套課程會有個唔錯嘅 B2 程度、弱啲嘅 C1)
> 我唔建議學完 A2 嘅直接報第二幕，因為唔會有第一幕必知嘅知識 – (可以聯絡我)
> ⚠️ 注意第二幕嘅影片唔用廣東話主持 – 係用普通話 – 但係所有語音、教材用廣東話 ⚠️
我承認到咗呢個階段拍雙語、又加埋法文實在太多功夫，因為主持嗰陣講中文唔算多又覺得你哋聽到少少普通話都幾好啊)
提醒
1/ 喺我個網站入面，一個章等於其他地方嘅十個章節。
對我嚟講章節數係 9 定 900 冇咩所謂 : 重點係效率同埋直入重點。
總之第二幕嘅內容豐富過第一幕兩倍，但係一樣係三章 (當佢係六章囉)
2/ 網站嘅內容唔同於你平時喺網上見到嗰啲短片。
請分開 : 公開影片係屬於娛樂片而網站入面嘅教材係真正嘅課程。
3/ 如果你真心想學好、吸收晒網站內容再識得用出嚟，整體大概要用3至4年。
唔係3個月就搞掂。但我保證，你唔會覺得悶。即使中間會有難關，雨後一定天晴。
我相信，要識得用一門語言開玩笑、理解一種語言背後文化嘅細節，同時可以喺兩種文化中搵到共通點，先至係最難亦最重要嘅。
只有咁先可以真正互相了解。法文係世界上最有深度、最有文化、最詳細嘅語言。
第一係法文，第二係廣東話，之後先到其他語言。呢句係出於對所有語言嘅尊重。
補充事項：
1/ 呢套課程唔係為咗考試而設，我意思係課堂上用嘅字眼唔係嗰啲「為咗合格而讀」嘅語言。放心，唔係話如果會考試考唔到而且如果你要考試，我網站上有7套由A1至B2級嘅模擬試卷，免費畀你下載（註冊就得）。
啲試題雖然喺網上都搵到，不過我額外幫你哋翻譯咗做中文。（連結喺下面）
網站啱晒所有想學法文同了解法國文化嘅人，唔理你係7定77歲，唔理你做咩行業。
2/ 呢個學習法係完全自學形式：
冇咩「miss堂」、「要退錢」、「改時間」嗰啲煩事。
你想幾點學就幾點學，跟你自己嘅節奏。
我聲明：雖然越嚟越多人加入，但只要你係網站學生，雖然我唔教書、唔係老師、但係你有任何法文問題，我一定會親自覆你。
3/
3.1 網站冇用任何人工智能，我堅持要咁。
3.2 所有內容包括網站都係由我一個人親自構思、撰寫、拍攝同剪片，全・部・原・創。
試聽
我個語言背景簡介
我1981年喺巴黎出世，屋企都係法國人，
(十五代法國血統)。
我識四種語言：
法文、英文、廣東話同普通話。繁體字、簡體字我都識寫，手寫、毛筆都冇問題，當然又睇得明。
點解會咁？
因為我父母喺1983年搬咗去澳門, 帶埋我去啦 – 梗係帶埋我啦！你以為我未到兩歲打算自己坐飛機去啟德跟著再坐船去澳門賭錢咩。Non.
一開始，我係喺樓下幼稚園讀咗一年，之後就去咗最近嘅本地小學，喺嗰度讀咗三年，我就係咁學廣東話，好似其他細路仔女咁。我嘅廣東話基礎就係喺嗰三年打好，即係三歲到六歲喺利瑪竇小學讀書。
七歲嗰陣退學因為我講英文有口音同埋有啲曳。
之後有一段時間，我同私人老師學英文。過咗幾個月，澳門開咗第一間國際學校，啲課係用英文同普通話教：我喺嗰度讀咗一年，不過因為我實在太活躍，最後都要離開學校。
我嘅普通話基礎同注音符號就係咁嚟嘅：一年嘅國際學校（當時嘅普通話教材嚟自台灣）。
九歲啦，我就去咗澳門葡文學校。不過只係讀咗兩個月，因為啲課全部用葡文，我覺得唔啱所以我只可以返去上私人課，開始讀 CNED（法國遙距課程）：學文法、數學、歷史等法文科目。其間，之前踢走咗我嘅國際學校話辦普通話演講比賽，我老師幫我報咗名，於是攞咗第一名。
92年 – 11歲，我返巴黎 ……嗰度冇咗廣東話、冇咗英文，所有嘢都係法文：生活、學校，全部法文 – 雖然有搵普通話家教，盡量保持語感，不過老實講呢個我中文能力開始跌嘅時候。
1996年，我十五歲，一個人去咗北京一個月學普通話同埋簡體字。
嗰次真係叫醒咗我啲中文所以2001年又去北京，今次係長住。
去到北京之後，我讀電影，拍劇、拍戲，仲喺CCTV4主持節目，行晒成個中國。
我喺北京住咗七年，普通話飛到母語級。不過到我25歲嗰陣，我基本唔記得曬廣東話。
喺奧運之前我離開咗中國，去咗澳門，開始做一個廣東話學習節目《Cantonese In One Minute》，用英文主持，賣咗俾TDM電視台。嗰陣係澳門第一個自製節目被電視台收購。
但係其實就係因為我要準備呢個節目，自己重新學返廣東話。
之後幾年，我圍繞住中文做咗唔少嘢：
我整咗一套學廣東話同普通話嘅方法，又有開課…… 但我唔鍾意重複同一樣嘢100次。
我鍾意嘅係娛樂、拍片、整節目。
2014年，我就去咗台灣，創咗一套法文學習法，有片、有聲，全部都喺網上。
我係全世界第一個用普通話教法文嘅網站創辦人，亦係第一個用廣東話教法文、
網站2016年慢慢開始收學生。
為咗將法文、廣東話、普通話「拆件重組」，整成一套真真正正有效嘅學習方法，我花咗差唔多六年時間，犧牲咗好多。到而家，我都仲不斷做語言同文化相關內容，繼續更新網站。
再次講清楚：呢篇係語言背景介紹，唔係咩人生感言。
例如我由北京搬返澳門，其實唔關廣東話事；中間我又返過巴黎……我人生入面有好多重要時刻冇寫出嚟，冇講我重新學中文有幾難。呢篇文都唔係真正表達到我係邊個，亦唔講我點諗。但如果要用一句嚟形容我：我係一個對工作認真程度同要求好高嘅人 – 底下，我鍾意笑，亦鍾意逗人笑。我鍾意我架車、我架電單車、我鍾意演戲同埋黃家駒 + 永遠唔會厭倦每日學好玩嘅新字！
